Ég í djúpum s... í Laugardalnum - sönn saga um mann og sjálfvirk ljós á salerni...

Tæknin er yndisleg. 

Brauðristar, uppþvottavélar og buxnapressur.  Allt gerir þetta okkur lífið einfaldara og þægilegra Listinn hefði getað orðið 10 síður en þetta dugar.  Eitt sköpunarverk mannsins eru sjálfvirk ljós sem kvikna við hreyfingu og slokkna sjálfkrafa eftir ákveðna stund.  Hvar væri heimurinn án þeirra?, - spyr ég og horfi hugsandi út í loftið.  Reyndar horfi ég á hillu fyrir ofan hausinn á mér en hitt hljómar betur.

Ég væri í betri málum án þeirra og laus við eilítið bremsufar í brók einni...

Ástæða þessa lífræna bremsufars og kveikjan að þessum hugleiðingum mínum um stórsigra mannsins á tæknisviðinu, er ferð mín á salernið í sundlauginni í Laugardal.  Á góðviðrisdeginum sem var í gær, ákvað ég á milli funda að bregða mér þangað og labba pínu um og ná mér í smá brúnan lit... ekki í brókina mína heldur á þann stað sem hugsar um frábær afrek mannsins sem sérstaklega ulla framan í menn eins og mig.  Klöppum ekki fyrir þeim sem fundu upp sjálfvirka ljósastýringu.

Nóg um það.  Ég rölti inn og hefst handa.  Og þar sem ég sit í þungum þönkum og velti fyrir mér sérstöku dulmáli Framsóknarflokksins ( segja við ætlum ekki, en ætla samt ), þá slokkna ljósin

Noh! hmmm, hvað nú?

Hvar var klósettpappírinn?  þreifa þreifa, jú hér er eitthvað.  Ég byrja svo hið vandasama verk að hreinsa óæðri endann í niðamyrkri, þar sem gæðastjórnun er ekki hægt að koma við til að meta árangur erfiðis míns.  Í huga mínum tralla ég landsliðslagið í handbolta og reyni að gera mitt besta, stend svo upp, girði mig og þá fyrst kemur einhver labbandi inn, sem með sinni yfirþyrmandi nærveru, kveikir á ljósunum á ný.

Í nokkrar sekúndur fannst mér eins og ég hefði heyrt fliss eða bældan hlátur koma ofan frá.  Líklega ljósakerfið að skemmta sér á minn kostnað.

Hvers konar framfarir eru það að bjóða upp á salernisaðstöðu sem krefst samvinnu til að klára málin?  "Gunni!  Ég þarf að skreppa aðeins, nennirðu að koma með mér og dansa diskó fyrir framan salernin til að halda ljósunum kveiktum?"

Tæknin lengi lifi...